Тестирање за СПБ
Ако досега никогаш немаш направено тест за сексуално преносливи болести / инфекции (СПБ/СПИ), оваа статија ќе ти помогне да се подготвиш за тоа што те очекува кога ќе одиш на преглед.
Ако наскоро започнуваш сексуална врска со нова личност, многу е важно претходно и двете страни да се тестирате за СПБ. Многу СПБ имаат малку или никакви видливи симптоми, а ти и/или потенцијалната нова личност во твојот живот може да носите инфекција од поранешна средба без воопшто да знаете за тоа. СПБ можат да бидат опасни по живот (или барем да го променат животот) и секогаш треба да се сфаќаат многу сериозно. Запомни дека кога имаш секс со нова личност, практично имате секс и со секоја личност од вашето сексуално минато - отрезнувачка помисла!
Од друга страна, можеби имаш некои симптоми што укажуваат на можна СПБ и одлучуваш да се провериш. Добро - те фаќа нервоза, нели? Почнуваш да размислуваш што правеше во изминатата година. Се враќаш во мислите на тоа кога се сретна со онаа девојка во барот или со оној згоден дечко во клубот, во жарот на моментот го или ја одведе кај тебе и имавте авантура за една ноќ; или пак кога имаше голема кавга со бившата или бившиот затоа што те изневери, но сепак завршивте заедно уште еднаш за последен пат. Се прашуваш: дали тој користел кондом кога бил со онаа друга девојка или дали таа се заштитила кога ме изневери? Дали онаа девојка или оној дечко со кого бев таа една ноќ можеби имаше нешто и не ми кажа?
Закажување термин
Размислуваш за сите овие работи додека го вртиш бројот за да закажеш преглед за сексуалното здравје; те облева пот и ја спушташ слушалката. Ослободи се од маките, земи го телефонот, бирај и закажи термин. Тоа е најдоброто што можеш да го направиш за себе и навистина не е голема работа. Најдобро е да дознаеш што не е во ред, ако воопшто нешто не е, и потоа да го преземеш тоа во свои раце. Сега ќе ти кажеме што можеш да очекуваш кога ќе стигнеш во ординацијата и како да поминеш низ сѐ речиси безболно!
Кога ќе стигнеш во клиниката
Кога ќе стигнеш во ординацијата, се пријавуваш и пополнуваш неколку обрасци. Обрасците бараат демографски податоци, како каде живееш, возраст, датум на раѓање и податоци за осигурувањето. Те викаат по име и некој од медицинскиот персонал те води во просторијата за прегледи. Ти ја мерат тежината, потоа ти даваат чашка и те праќаат во тоалетот. Погрижи се да ги искористиш малите спакувани хигиенски марамчиња што ти ги даваат за да ги исчистиш интимните делови. Ова е за да се отстранат сите бактерии и да се добие чист, стерилен примерок урина. Откако ќе излезеш од тоалетот, те носат во просторијата каде што ќе се направи прегледот. Потоа се прави почетниот дел од прегледот, како мерење на крвниот притисок (кој досега можеби е малку покачен), пулсот (можеби ќе ти се чини дека срцето ти чука лудо) и неколку прашања како: "Кога ти беше последната менструација?" (за жените) и "Има ли нешто што те загрижува и сакаш посебно да се погледне?"
Кога ова ќе заврши, ти даваат мантил и излегуваат од просторијата. Откако ќе се пресоблечеш, што следува? Седиш и чекаш уште малку. Разгледуваш наоколу; гледаш неколку списанија на полицата на вратата, па земаш едно за малку да се смириш. Токму кога ќе најдеш статија што звучи навистина интересно и вреди да се прочита... тук-тук. Сега те повикуваат на преглед.
Најчесто прво малку се разговара за да ти се смират нервите и да може да започне прегледот. Обично се почнува со многу прашања, како на пример: кога последен пат имаше интимен однос со некого? На која возраст почнаа твоите интимни врски? Дали некогаш се случило да имаш секс без заштита? Со колку луѓе досега имаш имано сексуални односи? Направи си услуга на ова прашање: не лажи. Подобро е да ја кажеш вистината, за да можат да ти помогнат најдобро што можат.
Преглед кај жените
Откако ќе поминат сите претходни чекори, следува физичкиот преглед. Момци што го читате ова: освен ако не сакате да знаете низ што поминуваат жените на гинеколошки преглед, слободно прескокнете на следниот дел. Жени, еве што генерално може да очекувате.
Ќе треба да легнеш на грб (намести се што поудобно), да ги ставиш стапалата во држачите, и ќе те замолат да се опуштиш колку што можеш. Колку помалку напнатост, толку подобро ќе помине целото искуство. Дишај и мислено пренеси се на поубаво место. Опушти ги вагиналните мускули и спекулумот влегува. Можеби ќе ти се чини малку ладен; обично се загрева во топла вода. Спекулумот се користи за да ги држи вагиналните ѕидови отворени додека се зема ПАП-тестот и брисевите за култура.
ПАП-тестот се состои од следново: пластичен инструмент што се вовлекува во вагината и се поминува по грлото на матката. Така се собира примерок од клетки од грлото на матката за тестирање. ПАП-тестот проверува дали има абнормални клетки што би можеле да бидат малигни или да доведат до рак ако не се лекуваат. Истиот примерок може да се тестира и за хуман папиломавирус (ХПВ), честа инфекција што ја добиваат многу жени; нема лек за самиот вирус, но повеќето инфекции исчезнуваат сами од себе, а клеточните промени и брадавиците што ги предизвикува можат да се лекуваат.
Потоа ќе те прашаат дали сакаш да ти се направи бактериска култура. Кажи да. Оваа култура проверува за хламидија и гонореја. Двете се сексуално преносливи болести што обично се асимптоматски (што значи дека немаш никакви видливи симптоми што ти кажуваат дека има инфекција) и можат да доведат до воспаление на карличните органи и потенцијално да предизвикаат неплодност ако не се лекуваат.
Кога ќе се завршат овие два теста, спекулумот се вади; потоа се ставаат ракавици, се подмачкува прст и се вметнува во вагината, додека се притиска на стомакот. Причината? Да се опипаат внатрешните органи (јајниците и матката) за да се провери дека нема абнормалности. Прстот излегува и, погоди што... готово е! Облечи се и врати се во ординацијата на разговор. Разговарај за методите на контрацепција ако сакаш нешто да ти се препише. За околу две недели ќе ти се јават со резултатите од ПАП-тестот и културите. Но пред да заминеш, побарај уште една работа... тест на крв за ХИВ. Ако веќе правиш преглед, направи сѐ како што треба.
Преглед кај мажите
Твојот преглед ќе изгледа отприлика вака. Ќе те прегледаат однадвор за какви било испакнатини, осип или што било необично. Ќе проверат дали има брадавици и ќе те прашаат дали те болело при мокрење или дали имаш исцедок од пенисот. Ќе сакаат да знаат и дали неодамна ти било отечено грлото или дали имаш отечени жлезди некаде. Ќе ги прегледаат пубичните влакна, отворот на уретрата и анусот (можеби ќе треба да се направи дигитален ректален преглед ако постои можност за брадавици или воспаление на простатата). Потоа доаѓа делот од кој момците стравуваат - кој денес обично е само мокрење во чашка, иако некои клиники сѐ уште земаат брис од врвот на пенисот. Во секој случај, примерокот оди во лабораторија за да се провери за сексуално преносливи болести (гонореја и хламидија). Речиси готово.
Потоа се проверува дали има ингвинална хернија, така што ти го држат скротумот додека те замолуваат да закашлаш. Готово е... "Јееј!!!" Но чекај, уште една работа. Исто како што им рековме на жените, погрижи се да побараш тест на крв за ХИВ. Ова е единственото нешто за кое не се тестира примерокот урина или брисот, а сепак е еден од најважните тестови.
Заклучок
Ете, тоа е прегледот за сексуалното здравје накратко. Ако се најде нешто што не е во ред, многу често може да се лекува истиот ден. Хламидијата обично се лекува со една недела антибиотски таблети, а гонорејата со една инјекција антибиотик.
Па, дали беше толку лошо? Можеби малку, но дали вредеше? Апсолутно! Сакаш да го знаеш најдобриот начин да ја намалиш целата таа напнатост пред тестот следниот пат? Користи заштита секој пат кога имаш каков било интимен однос со друга личност, освен ако не си во доверлива долгорочна врска во која веќе сте тестирани. Сѐ што ти треба можеш да најдеш во продавница: кондоми, женски кондоми и орални заштитни мембрани (за орален секс). Можеш да одиш и во локалната клиника за сексуално здравје, каде што многу од овие работи се достапни бесплатно.
