Женски циклус на сексуален одговор

Неверојатно е да се помисли колку огромни физички промени се случуваат во женското тело за време на сексуалната возбуда … не само во фазата на оргазам, туку низ целиот циклус на нејзиниот сексуален одговор. Од моментот кога мозокот ќе регистрира сексуален интерес, па сѐ до периодот по врвот на задоволството, мажите и жените имаат сличности во тоа како нивните тела реагираат на фазите на сексуалната возбуда; но најчесто до нив стигнуваат со различно темпо. Згора на тоа, физичката реакција на жената на сексот е помалку забележлива и, често, многу повеќе погрешно разбрана.

Преглед

Ниту оргазмот, ниту разбирањето на физичките и емоционалните фактори што водат до него, не мора да бидат мистерија. Иако можеби не постои утврдена шема за сексуалниот репертоар, одговорот, генерално, следи одредена шема - а циклусот на човековиот сексуален одговор е модел на таа шема; поточно, петте физиолошки фази низ кои минува човечкото тело како одговор на сексуалната стимулација. Сексуалниот одговор на жената е сложена интеракција меѓу неа и личноста со која е, и ако заедно разберат како женското тело реагира на разговор, допир или дури само на сексуална напнатост, во сексот би можело да се ужива многу повеќе!

Ќе ги разгледаме петте фази на сексуалниот одговор по редоследот по кој се јавуваат...

Фаза 1: Желба

Почетната фаза, наречена желба, е витален дел од сексуалниот одговор кај жените и многу се разликува од она што мажите обично го доживуваат. Штом ќе се појави некаков поттик, било да е тоа еротска мисла или сензуален допир, многу мажи се способни да ги доживеат фазите на желба и возбуда практично истовремено; ова е сосема спротивно од повеќето жени, на кои може да им треба од неколку минути до еден час пред да бидат физички подготвени да преминат во следната фаза на сексуалниот одговор.

За разлика од мажите, кои силно се возбудуваат од визуелни дразби, жените се многу поприемчиви за допир во почетните фази на возбудата. Нејзиниот физички и психолошки одговор на желбата ќе зависи и од нејзината ментална и емоционална состојба во тој момент. На многу жени им е многу потешко да изградат желба кога вниманието им го одвлекуваат анксиозност, стрес или ниска самодоверба.

Пред возбудата:

• срамните усни и вагината се светлорозови и во опуштена состојба;
• како што расте сексуалната возбуда, нејзината кожа станува сѐ почувствителна на допир.

Бидејќи процесот на возбудување кај жените често е побавен отколку кај мажите, важно е жената да ги искомуницира своите потреби со личноста со која има секс и да ги изрази сите потреби што ги има во фазата на желба, било да е тоа повеќе време за предигра или одреден вид стимулација.

Фаза 2: Возбуда/Надраженост

Физичката возбуда кај жената може да започне штом таа доживее некаков пријатен контакт со другата личност - или сама со себе. Штом работите ќе тргнат, таа минува низ физичкиот процес што ја подготвува за секс.

Исто како што пенисот почнува да ја менува формата кога ќе се возбуди, така и женските гениталии минуваат низ физичка промена, иако таа честопати може да се случи без воопшто да биде забележана. Појавата се нарекува ‘шаторење’ и се случува кога вагиналниот канал добива форма на нешто како покриен шатор; тој исто така се издолжува.

Дополнителни физички промени што се случуваат се:

• вагината се навлажнува;
• надворешните срамни усни отекуваат до над три пати од нивната првобитна дебелина и се раздвојуваат од вагиналниот отвор;
• вагината и срамните усни добиваат темноцрвена или виолетова боја поради зголемениот прилив на крв во гениталиите;
• клиторисот се исполнува со крв, а околното ткиво исто така отекува;
• градите почнуваат да отекуваат, а брадавиците се стврднуваат;
• крвниот притисок се зголемува за приближно една третина;
• брзината на дишењето, мускулната напнатост и пулсот се зголемуваат;
• се јавува намалена чувствителност на болка.

Фаза 3: Плато

Постојаната сексуална напнатост игра витална улога во одржувањето на возбудата, и како што сексуалната напнатост расте, а стимулацијата продолжува, патот на жената низ циклусот на сексуалниот одговор постојано се искачува сѐ поблиску до оргазмот.

Во оваа фаза:

• матката се подига во својата физичка положба, а клиторисот станува повидлив под својата качулка;
• надворешната третина од вагината и матката дополнително се исполнуваат со крв;
• над една третина од жените се потат, најчесто на челото, горната усна, градите, под пазувите и меѓу бутовите;
• може да се појави сексуално црвенило што се шири од грлото, градите и стомакот.

Кога ќе се споредат половите, мажите брзо се возбудуваат и доживуваат подолг период на плато - и во одреден момент може да ја прекинат стимулацијата за да не стигнат до оргазам пребрзо. Жените, пак, може да имаат потреба од повеќе време за да се возбудат во втората фаза, но им треба само краток период во фазата на плато. Всушност, дури и по оргазмот, ако жената е доволно возбудена, може да се врати во фазата на плато и да продолжи со сексот.

Фаза 4: Оргазам

Ниту две жени не доживуваат оргазам на сосема ист начин. Чувството на врвот на задоволството може да се доживее како искуство на целото тело или да остане сконцентрирано во гениталиите. Оргазмите може да се чувствуваат моќно, преплавувачки и да траат кратко - или може да се почувствуваат како треперење на сензации, со поблаг интензитет, развлечено во подолг временски период. Штом ќе го достигне врвот на задоволството, нејзиното тело доживува оргазмични контракции - исти кај мажите како и кај жените - неволно стегање на мускулите како одговор на оргазмот. Овие контракции се случуваат во интервали од 0,8 секунди.

За време на оргазмот се случува следново:

• дополнително вагинално навлажнување;
• други делови од телото може неволно да се грчат;
• ѕидовите на вагината, грлото на матката и матката ритмички се собираат;
• како што се ослободува сексуалната напнатост, телото брзо реагира со пумпање крв од исполнетото ткиво назад кон остатокот од телото;
• мускулите на карлицата и анусот се собираат;
• во некои случаи може да дојде до женска ејакулација.

Фаза 5: Смирување

Жените се разликуваат од мажите по тоа што немаат рефракторен период (времето по сексот во кое човек физички не може повторно да се возбуди). Ако остане сексуално возбудена и стимулацијата продолжи, жената може да продолжи да прима стимулација и да доживува оргазам, повторно и повторно. Оваа фаза од возбудата е подолга кај жените отколку кај мажите и е одлично време за заедничка постигра, времето по сексуалниот однос кога можеш да уживаш во сензациите и да го продолжиш интимниот контакт ако така сакаш. Бидејќи не ја кочи рефракторен период, жената во фазата на смирување може да се препушти на уште сексуална активност ако е сѐ уште возбудена и ако била доволно стимулирана.

Исто така, за време на смирувањето:

• штом сексуалната напнатост ќе се ослободи со оргазмот, крвта се повлекува од половите органи, поради што гениталиите се намалуваат, а кожата го губи црвенилото;
• мускулите се враќаат во опуштена состојба;
• крвниот притисок, пулсот и брзината на дишењето се враќаат во нормала.

Завршни мисли

При хетеросексуален секс често доаѓа до несовпаѓање на сексуалниот одговор, поради што жените чувствуваат притисок да доживеат оргазам, што, за жал, ја попречува нивната способност доволно да се возбудат за да го доживеат!

Како што ќе потврдат и многу мажи што имаат анксиозност поради изведбата, кога чувствуваш дека мораш сексуално да дејствуваш пред умот и/или телото да ти бидат подготвени, тоа е доволно да го осуети искуството дури и на најпотентните луѓе. Затоа е од голема корист да го разбереш својот сексуален одговор и оној на личноста со која си и на двата одговора да им го посветиш времето и вниманието што го заслужуваат во секоја фаза од возбудата.